سوف نتحدث في هذا المقال عن الات القهوة ومنها ” آلة قهوة كبسولات او اله قهوة مطحونة مع جهاز حليب او بدون وغيرهم الكثير من الألات،حيث ان كل شخص محب للقهوة يتمنى يكون عنده آله مميزة لقهوته و خصوصاً هالفترة، اقدر اسميها آله تعديل المزاج، واضمن لك راح تشتغل بروقان كل يوم، هذا مقال يخليك على بينة في انواع الات القهوة المختلفه وايش ممكن يخدمك شخصياً ؟!
بتقول لي آلات القهوة كثير وما اعرف ايش يناسبني.. اقولك أول شي كم تبي تستثمر في قهوتك؟ ضروري تحدد ميزانيتك
يهمك انك تعيش تجربة خطوات التحضير خطوة بخطوة؟ او مستعجل دايم وتبي قهوتك بسرعة؟
ثالث شي تبغاها آلة كبسولات أو آلة قهوة مطحونة ؟
يهمك جهاز الحليب او تحبها سوداء؟ تبغاها تحضر لك انواع قهوة مختلفه أو نوع واحد يرضيك؟
مع اجابتك لهالكم سؤال راح يقل النطاق وتنحصر خياراتك بحيث يكون الاختيار اسهل لانك صرت تعرف ايش تبغى الحين.
قبل أي شي حط ببالك: منطقياً مهما كانت الآلة حديثة وكويسة فالسر موجود بجودة قهوتك اللي تستخدمها
بستعرض كم آلة بتقنيات واسعار وشركات مختلفة بالاضافة للمميزات والمساوئ ان وجدت.
1- Aeropress :
الة الايروبريس هي الة بطريقة تقليدية، تتميز بالبساطة وسهولة استخدامها و سعرها المناسب، والاهم انتاجها لقهوة بجودة عالية، لدرجة البعض يفضلها على انه يشتري آله تكلف الآلاف.
2- Filter coffee machine :
هذا النوع من الآلات اعتقد انها تناسب فئة اكبر من غيرها من الناس، سعرها مناسب وموجودة بأغلب المحلات. تتميز بانك تقدر تسوي كمية اكثر من كوب و يمشي معها اغلب انواع حبوب القهوة مثل( دانكن او تيم هورتنز ) سهلة جداً عبارة عن ( قهوة مطحونة + فلتر ورق + ماء ).
3- Capsules coffee machine :
مثل الات نسبريسو او دولتشي. أسرع منها مافيه، نكهات مختلفة بقوة مختلفة.
لو عجبتك نكهة معينة في هذي الآلة تضمن لك انك راح تذوق مثل الطعم في كل مره. لكن انت مضطر تشتري كبسولات بشكل معين على حسب آلتك.
4- Multi-capsules coffee machine :
لو كنت تبي آلة كويسة وتقبل حبوب القهوة مطحونة وحتى كل انواع الكبسولات فعندك ( Homix coffee maker ) تجمع لك كل شي وتختصر عليك. بحيث لو خلصت كبسولاتك فيكون عندك خيار ثاني انك تحضر فيها قهوة مطحونة.
5- bean-to-cup machine :
مكينة ( SAGE او Breville ) تعتبر مكينة احترافية مناسبة للبيت، مكينة الاسبريسو هذي تعتبر من الافضل لعشاق القهوة الطازجة لأنها تحضر القهوة من عملية طحنها الى تقديمها جاهزة بالكوب، كل شي فريش، الطحن فيها له مستويات مختلفة.
المكينة موجودة فيها كل احتياجات الاسبريسو الاحترافيه، تقدر تقول سلبيتها الوحيدة هي سعرها المرتفع.
اخيراً مهم جداً جداً انك تختار نوع قهوة كويس اذا كنت تبي طعم يرضي ذائقتك واكيد عرفت وش اللي يناسبك
شاركني صورة وتجربتك مع آلة قهوتك.
