يضم هذا المقال معايير سباهي للمختبرات التي يمكن لكل موظف في المختبر او طالب إمتياز مختبرات طبية عبارة عن نصائح قبل زيارة أي جهة اعتماد لتقييم العمل وخطواته وتقييم المنشأه (المختبر) بشكل عام من موظفين، للأجهزة، لبيئة العمل، لتقديم الخدمة.. إلخ

خلونا نأخذ سيناريو ونبدأ نتكلم:

  • نفترض ان المختبر فيه 200 موظف ويقدم خدمات كثيرة (اغلب الأقسام موجودة)، وجهة التقييم او الإعتماد هي سباهي.
  • أول شيء لازم نعرف أن العمل في مختبر عنده اعتماد، عمل سلس وفيه الأوضاع بشكل عام مريحة (الموظف مرتاح نفسياً وعارف ايش يسوي) بعكس العمل في مختبر ليس لديه اعتماد.
  • بعد التواصل مع جهة الإعتماد سباهي (طبعاً إذا كان المختبر مطبق المعايير المطلوبه وعنده ثقه بخطوات العمل والخدمه المقدمه يتواصل مع سباهي ويطلبهم زيارة).
  • الزيارة تكون حبيه (فريندلي) لأخذ فكرة والتعرف على أقسام المختبر (هنا المُقيّم اللي جاء يأخذ إنطباع عن المختبر، إنتبه)
  • وبعد كذا فيه زيارة رسمية تكون خلال أسابيع أو أشهر قليلة… هنا يبدأ الشغل على تحقيق كل المعايير المطلوبه (عشان تحصل على الإعتماد) يبدأ دور المدير ورؤساء الأقسام، طبعاً لازم يكون فيه جديه وعمل مستمر والقلوب تكون على بعض (لأن ممكن واحد من الموظفين يهدم مجهود المجموعه، ركز)
  • العمل يبدأ من الإستقبال الرئيسي إلى الحمام أعزكم الله مروراً بالأقسام كلها والإداره والتموين( لا تتوقع أن تحصل على الإعتماد وعندك ملاحظات حتى على مستوى النظافه)
  • فيه نقطه مهمه بصراحه اشوفها مهمه لتحقيق أي إعتماد سواءً سباهي أو الكاب أو الآيزو اللي هي مستوى المعرفه لدى العاملين
  • يجب أن يكون هناك تحفيز لرفع المستوى المعرفي عند كل الموظفين بشكل عام (وخصوصاً في القسم، يعني تعمل في المايكرو المفروض تكون متمكن علمياً عشان تجاوب على كل سؤال، وهكذا مع الأقسام)
  •  بعدين نآخذ البولسي ونخليه متطابق مع المعايير المطلوبه (يعني سياسة القسم مبنيه على معايير علميه)
  • الموضوع يحتاج دعم نفسي ومادي (مثلاً : أدوات مكتبيه، منظفات، معقمات، توفير الـ PPE، معدات السلامه من طفايات حريق و لوحات إرشادايه و First Aid).. إلخ بدون التأثير على خط سير العمل (يعني نزل موظفين على الشفت ليت، دوام يبدأ 10ص وينتهي 6م مثلاً وناس تبدأ 2م الظهر الين 10م)… عشان يكون فيه عمل متواصل طول الوقت وبنفس الطاقه (شغل متصل و متتابع)..
  • ابدأ بالشغل الورقي ( ملفات الموظفين في الأقسام.. البرسونال فايل) حدثها وتأكد أن كل الفورمات موقعه وموجوده في الملف.
  • طبعاً الملف الشخصي يحتاج تعاون من الموظف لأن فيه مستندات مطلوبه لازم يوفرها)
  • عندك البولسي جداً مهم يكون محدث و موقع والكل عارفه (ترى البولسي مهم، لأن المقيم راح يسألك كيف تسوي إذا صار كذا كذا بعد ما تجاوبه يقلك هذا الشئ موجود في البولسي و إلا من كيسك؟ تقوله بولسي يقولك هات اشوف) عشان كذا أي موظف لازم يعرف كل كلمه في البولسي حق القسم (بليز، ارجوكم)
  • نجي عند الأجهزه، ترى لازم يكون فيه ملف صيانه ومتابعه ويكون فيه ورق للفالديشن (يعني الجهاز هذا ما هو مجهول) … الجهاز في القسم وله طلبيه وله صيانه ومعتمد (هنا دور المهندسين، اشغلهم معك.. اطلبهم كل مستندات الأجهزه والصيانه الدوريه.. وإثباتات التدريب على الجهاز وكذا)  معليش كل اللي في القسم لازم يعرف يتعامل مع كل الأجهزه في القسم (نظام هذا جهاز فلان/ فلانه عارف فيه كل شئ، ما ينفع) واصلاً غلط، إذا طلع اجازه هذا الفلان خلاص الشغل يتعطل؟!
  • وهنا نقطه مهمه (جداول الشغل وتكون روتيشن يعني الكل يلف على الأجهزه ويشتغل كل شئ).
  • برضو عندك تنسيق الإجازات مهم عشان العمل ما يتأثر ( بنسبة 0.05% يسألك المقيم عن جدول الإجازات/ ولكنها شئ مهم في خط سير العمل والإنتاجيه)
  • قبل اتكلم عن الأشياء المهمه حاب اقلكم أن المقيم موظف زيك زيه وقد تكون ملم في أمور هو ما يعرفها.. فلا ترتبك أو تتوتر، الأسئله كلها في شغلك
  • ركز على الإستقبال الداخلي في القسم ( خلي عندك فورم معتمده في البولسي حق القسم اسمها إستقبال العينات) تدرج فيها اسماء وأرقام عينات الـ Care of مثلاً ونوع الأختبار المطلوب ومن فين جات (هذا راح يفيدك في الإحصائيات)..
  • طبعاً إستقبال العينات في القسم مهم لأنه يحدد جودة شغلك، الإستقبال الرئيسي له سياسة خاصة تفرق عن الاستقبال اللي في الأقسام ( من هنا يبدأ عمل المختبر).
  • فيه اتفاقيات خارجيه واتفاقيات داخلية.. اللي يسمونها Ex. agreement و الـ Inter. agreement، يهمني يكون موظف الإستقبال عارفها.. ( عشان يعرف يتفاهم مع الجهات الأخرى)

 

نرجع للأقسام..

  1. الشغل المكتبي : الأوراق والكمبيوترات والتليفون تكون في منطقه آمنه ومحدده، يعني اللي لابس قلفز، لا يدخلها الين يتعقم )
  2. الشغل الفني: يكون محدد وقبل تدخله لازم تكون جاهز (PPE) إفصل المنطقتين بدهان ارضي بشريط لاصق (شطرطون).
  • المهم الكل يعرف ان هذي منطقة عمل.
  • شوف، حتى لو المقيم نفسه جاء بيلمس شئ وهو ماهو لابس قلفز قوله البس قلفز ( ترى يحترمك).
  • بالله عقم مقابض الباب والثلاجات ولا احد يلمسها بالقلفز.. (عشان ما يضر غيره)
  • المقيم إذا دخل راح يسأل غالباً عن آخر موظف دخل القسم ( اجدد موظف) ويسأله: عن الـ Maintenance وعن الـ QC
  • وهنا معلومه مهمه : ترى الـ QC شارت فيه اسئله كثير، يعني لا تكتفي بأن كنترولاتك في الرينج المحدد ترى فيه شفتات تصير (اوك في النورمل رينج ولكن كلها فووق او كلها تحت، في شئ غلط)
  • إذا مشيت الكنترول مره ما ضبط مرتين ماضبط لازم تجيب الكوريكشن اكشن فورم وتكتب ايش صار وتحفظ الصيانه تكون مثبته بـ Documents ممكن تسأل عنها.
  • الكنترول لازم عليه تاريخ متى بدأ الشغل عليه واسم اللي استخدمه (انيشيال يعني حرفين من اسمك ويكون متعارف انه انت/ي).
  • الويست حق الأجهزة تكون تحت السيطرة (لو كمية الويست زادت راح تأثر على الجهاز وممكن تنسكب في القسم)
  • الإنفينتوري(Inventory) هنا مشاكل المختبرات صراحه وهنا سبب عدم حصول اغلب المختبرات على الإعتماد..
  • نظام طش الكتات والكنترولات في الثلاجه واي شئ عندك احفظه بدون ترتيب غلط.
  • لازم فيه لست بكل شئ موجود وموضح الكميه المصروفه والمستخدمه والمتبقية.
  • لازم فيه سنسور للحراره وتسجيل يومي
  • معليش بس ممنوع الأكل والشرب في القسم او حفظها في الثلاجه، ممنوع جداً ارجوكم.
  • طبعاً بالتفاهم مع مسؤول الجوده في القسم لازم الكل يعرف كل المعلومات وكل ما يخص عمل الجوده في القسم.
  • وترى الجوده يعني جوده يعني مافي أخطاء يعني صح..(بليز تركيز).
  • مختبر بدون جوده، يعتبر خرابه.

تعال نشوف السيفتي والإنفيكشن كنترول…

  • معليش كيف موظف مختبر وما تتقبل الماسك او النظارات او القاون….يا اخي هذي زي درع المحارب ما يتخلى عنه في ساحة القتال… وانت/ي تقاتل في ساحة المايكروبات.
  • غسل اليدين.. وفركها بالكحول للتعقيم مهم برضو (الطريقه الصحيحه، فيها اسئله)
  • إستخدام الـ Spill kit مهم تعرف ليش وكيف تستخدمه..
  • الـ RACE و الـ PASS مهم تعرفهم..
  • الآي ووش.. والشاور تكون جاهزه للإستخدام ودفع المياه فيها كويس والكل يعرف كيف يستخدمهم عند الحاجه.. و مكانهم مناسب (هنا دور المهندسين)
  • الكونتينرات.. أعرف كل نوع.. فرق بين الشارب والعادي
  • حاسب على المسافه والعدد الموجود… حاسب على الصوت (تجنب إزعاج الأجهزه) … جلستك تكون صحيحه… (شغل سيفتي.
  • ممكن يسألك عن كيف تستخدم الـ Spill kit وممكن يفتح الحقيبة حق الإسعافات الأوليه ويشيك…
  • ممكن يشيك على اسطح البنشات اذا فيها وساخه… يرسبك شيكلست التعقيم مهم
  • الهاوسكيبنج لازم يكونون فاهمين كل شئ في شغلهم (لابسين يونيفورم، معاهم الـ ID).. وعندهم كل معدات السلامه المطلوبه ( علامات ان الأرضيه مبلله عشان لا أحد يزحلق، عندهم القفاز السميك المطاطي عشان الشارب ويست، القزاز والإبر…)
  • الكل يكون عارف رقم الطوارئ في حال حدوث مشكله.. مهم.
  • الكل يكون عارف الكودات وايش يعني كل لون… عشان اذا جاء نداء يعرف يتصرف.
  • وهنا دور السيفتي اوفسر.. لازم يكون فيه خطة إخلاء تجريبيه محدده يعني معروفه متى و وحدة مفاجأة بدون احد يعرف عشان يقيم مدى فهم وتعامل الموظفين مع الحدث عند الحاجه (وكل شئ مثبت في ورق)

ملاحظة:

  • اللغه الإنجليزيه معتمده في المجال الطبي اكثر.. حاول تحسن لغتك في مجال عملك.. يعني اذا سألك المقيم عن الأكشن اللي تتخذه في حال ان السيستم داون ترى يقصد بلان B قول نرجع للمانويل ويكون عندك فورمات لهذا الشئ ومسجل في البولسي… خليك واثق من نفسك ترى المقيم جاي يقيم شغلك فقط.
  • الكلام مبسط جداً.. بين كل كلمه وكلمه جهد وعمل جاد..

👈 الكل يجب أن يهتم ويجتهد للمصلحه العامه…

👈 تعمل في مختبر معتمد ومطبق المعايير احسن من شغلك في مختبر لا يطبق شئ (ترى جد تعرض نفسك للخطر)

👈 موظف غير مهتم وهمه الراتب فقط زيه زي اي منتج من جولي شك، عفش زايد في المكان.

مصادر.