مراحل تطور مساري الوظيفي كمحاسب

بكتب هذا المقال عن مساري الوظيفي كمحاسب وعن حياتي كمحاسب له 13 سنة بالسوق قد تكون مفيدة لمن يدرس محاسبة او يتخصص محاسبة ؛ او حتى شخص يبي #وعي عن عالم المال والتجارة طبعاً بديت حياتي كمحاسب راتبه 2800 ريال وانتهيت بدخل يزيد عن 80 الف ريال شهري وامتلاك اصول ثابته بالملايين.

مراحل تطور مساري الوظيفي كمحاسب

بداية عملي

مساري الوظيفي كمحاسبتخرجت من المحاسبة من جامعة الملك سعود عام 2006م وتقدمت ومعدلي كان مقبول وكلما قدمت على اي جهة قالوا معدل منخفض رح الله يرزقك.

استمريت ابحث لحدما وجدت مكتب محاسبة في حي العليا بالرياض في فلة قديمة وانا السعودي الوحيد عندهم وراتبي 2800 ريال وقتها استلم راتبي كاش.

طبعاً كان يخصم منه مبالغ من المدير المصري وكل مرة حجة ؛ مرة لاني تاخرت 10 دقائق خصم 150 ريال؛ وخصم 50 اضافية في الشهر الثاني لاني ما اكملت الشغل وفقاً للوقت المحدد ولاعمري وين الشغل لان المعاناة انهم مايعطوني اي شغل بس كنت ملقوف اذا سحبو عينات من الحسابات احاول افهم القصة.

اكملت ٣ شهور وانا معهم ومعاناتي لا تنتهي من ازمة انه ماحد يعطيني وجه من المحاسبين؛ طبعاً كانت خبراتهم 10 و 20 سنة ورواتبهم 2500 ريال فكنت مشخص براتبي عليهم ابو 2800 ريال ؛ صاحب المكتب متقاعد وكان كبير بالسن ولا كان مركز معهم.

ومرة حصل موقف ازعجني كثير … دخلنا بشهر رمضان وصاحب مكتب المحاسبة عزمنا على فطور وكان انا والموظفين المحاسبين من مصر ولما دخلنا على العشاء ؛ دخل اخو صاحب المكتب وقال خلاص اترك العمال يتعشون وتعال معنا انا محاسب محترم ينقال عن عامل!! زعلت وطلعت ولا حتى احد اعتذر !!

عملي في شركة سياحية جديدة

بعد ما كملت ٤ شهور مع المكتب وانا اعاني من طول ساعات العمل دون عمل حقيقي بس كنت اتعلم بشكل مبسط اتصلت علي شركة سياحية وحضرت المقابلة والحمدلله نسو يسالون عن معدلي( المقبول) واعطوني اختبار عرفت احله من عملي في المكتب جاني المدير وناظر حلي وعطلني قبول فوري مادري عن الراتب.

نسيت اسال عن الراتب بس وافقت لان الوظيفة مسماها #محاسب وسالوني كم تتوقع ؟ قلت 3000 ريال ! قالوا راتبك 5500 ريال

كان راتب كبير بالنسبة لي اهلني اسدد كل ديوني الشخصية واجمع منه.. واكملت معهم سنة كاملة تعلمت فيها المحاسبة من القيود الى اخراج الميزانيات كنت مستمتع.

خلال السنة في عملي في الشركة كمحاسب كنت اشعر بنواقص كثيرة عندي اهمها ان ماعندي لغة انجليزية ولا افهم منها شيء ؛ كنت ايضاً اتمنى ادرس سوكبا من الهيئة_السعودية_للمحاسبين واحترت هل ادرس لغة اولاً او ادرس سوكبا ؛ حلمي كان لا يتعدى ان اكون CFO في شركة اي مدير مالي.

الاعمال الثلاث التي تم عرضها علي

بعدما ما اكلمت سنة قدمت السيرة الذاتية كمحاسب خبرة سنة ونصف بدون لغة ولا شهادة مهنية مع اني كنت كاتب السيرة بالانجليزي بس اول شي اقوله ترا مامعي لغة، جاني اتصال بعدها من شركة_الكهرب كمراقب مواد ب6500 ريال وبعد اسبوعين جاني اتصال من #مصرف_الراجحي براتب 7500 ريال.

ربما يهمك  كيف استفيد من تمرين عجلة الحياة

وجاني اتصال ايضاً من شركة تبيني محاسب عندهم براتب 7500 ريال يعني ٣ عروض بنفس الوقت.

احترت جداً وجلست اكتب في مذكرة شخبطة ميزات وعيوب كل وظيفة ؛ اليوم اقراها وللاسف اغلب افكاري كانت غلط ! مثلاً كنت اقول وش الاريح فيهم! مافكرت احدد وين كل وظيفة بتوديني ( المسار الوظيفي).

كان مهم جداً قبل الموافق على الوظيفة ان احدد اي مسار له علاقة بالمحاسبة وراح امشي فيه طول عمري، مهم اعرف وين بروح بس وظيفة وخلاص ؛ ما توقعت المحاسبة متشعبة ولها فرص مالها حد باعطيكم امثله عليها ( مدير مالي يوصل راتبه 150 الف ) مدير مخاطر يوصل 180 الف مدير التزام 150 الف، مدير ضريبة ومدير زكاة مدير ائتمان وغيرها كثير مسارات قوية للمحاسب والمحاسببن اسرع ناس يصلون ليكونون رؤساء تنفيذيين في شركات ويمتلكون حصص في الشركة بالملايين مكافئات وتحفيز.

يقدر يفتح مكتب محاسبي ويعمل مع المحكمة في قضايا يكسب فيها زي المحاسبي يقدر يكون مقيم شركات واصول، ويقدر المحاسب يكون مدير محافظ وصناديق ريت ومدير يكون مدير مراجعة خارجية وداخلية وكثير محاسببن رؤساء تنفيذيين ونافذين في مصارف وبنوك وشركات وقطاعات حكومية ووزراء وغيرهم وعلى فكرة ماكان المعدل له اهمية الا في البدايات والا بعد فقط 3 سنوات بالكثير تصبح الخبرة هل المفصل.

عملي في الوظائف الثلاث

ماكنت ادرك على اي اساس اوافق على الوظيفة .. المهم الراتب ووين ؛ لكن مع وجود 3 عروض وبحكم اني ماحب افوت اي ريحة فرصة قلت اتوظف فيهم كلهم !! وبالفعل اشتغلت بشركة الكهرب مراقب مواد!! وحسيت ان شركة الكهرب هي مكان الابطال فيه المهندسين والمحاسب يصير لفل ثاني بعده لانه قطاع الكهرباء هندسي بحت وليس قطاع مالي اللي يكون فيه المحاسب له دور اهم واكبر.

بعد اسبوعين كلمت مصرف الراجحي لانه قطاع مالي وقلت ابي اشتغل معكم جيت استقيل من الكهرب واستغرب وانصدم المدير وكان طيب جداً اعتذرت منه بشدة ىقلت غلطتي وقليل تجارب واسمح لي اني ورطتك معي.
.. خرجت من شركة الكهرب واتجهت الى مصرف الراجحي في ادراة الائتمان ماكنت اعرف وش يعني ائتمان !! ديون ! قروض ،

محصل انا والا ايش!! وش علاقته بالمحاسبة .. كان مسار وظيفي ذهههب ماكنت ادري انه يعتمد عليه البنك في تحقيق ارباح توصل الى 10 مليار ؛ وظيفتهم يحللون الشركات قبل القرض، ويدرسون البنوك الشركة كانها شركة ابوهم قبل التمويل كل المؤشرات المالية اللي تخطر في بالك ممكن يستخدمونا في تحليلهم من الربحية؛ السيولة التغطية.الخ.

وهذا عمل كل البنوك مافي تمويل الا بتحليل كامل ومن يحلل ، فئة كبيرة منهم محاسبين لانهم يعرفون يقرون القصة خلف القوائم المالية.

كان مسار وظيفي مميز ؛ الى اليوم مادم اني طلعت منه ؛ طبعاً جيت المصرف اليوم الاول تعرفت على صديق لي قديم ايام الجامعة وكان الله يهديه سبب في انحراف المسار الوظيفي حقي هذا الرجل اقنعني استقيل ولسبب تافه، وكان السبب اللي اقنعني فيه استقيل من مصرف_الراجحي تافه جداً ؛ السبب ان المدير ما اعجبه! وانه ضعيف شخصية وبيتعبك بانه كل مرة يرسلك لشخص يقول تعلم منه!! طبعاً كان المدير حريص جداً انه يخلينا نتعلم من جميع الاقسام بس لضعف خبرتنا.

ربما يهمك  تجارب اروى العمراني انستقرام في التخطيط والتطوير

ما ادركنا وش يعني اول ما تتوظف تجلس مع زملاء حولك وتتعلم منهم حتى تفهم اجراءات العمل كلها ؛ وهنا انت مؤهل تمسك منصب اكبر لانك فهمت علاقة كل قسم بالاخر؛ ..اتذكر وقتها الصباح باشرت في المصرف الظهر تغديت مع الموظفين هذا وقبل نهاية اليوم قدمت استقالتي للمدير.

بداية طريقة للبحث عن عمل آخر

في نفس الوقت كنت مقدم على قطاع شبه حكومي مالي وفيه محاسبين وماليين واقتصاديين ومعروف هذا القطاع بالتدريب والابتعاث، ومنها فرصة يحقق لي هدف تعلم اللغة وايضاً الشهادة المهنية.. كنت متحمس اتوظف فيه، ورحت اول مرة ومعي اوراقي ودخلت على ادارة الHR وكنت ادور من اعطي اوراقي.

لقيت شخص متجمعين عليه ناس رحت لهم وحاولت افهم صار ياخذ CV بس يسال اول كم معدلك !؟ جاوب واحد معدلي ( جيد مرتفع) رد عليه: مانقبل اقل من جيد جداً !! وانا معدلي ( المقبول) وش اسوي فيه قررت ما امشي وسلمت اوراقي لعله ما يكشفني وسالني: كم معدلك؟ قلت ارجوك ارفع اوراقي وخلها تروح.

قلت لموظف الHR ؛ قد انجح بالمقابله بغض النظر عن المعدل واكون مناسب لكم ورفض !! طبعاً طلعت ولكن ماخرجت من القطاع رحت ادور داخل الادارات واحاول اقدم على المدراء وطبعاً رفضوا الا ادارة وافق يعمل لي مقابلة شخصية وللاسف رفضت منها ولا اعرف هي كانت رسمية والا عشان يصرفني !!

جلست فترة محبط ماعرف وين اروح ؛ هل ادور على مكاتب مراجعة او شركات او قطاعات حكومية؛ هذي الفترة ماكنت موظف باي شي والوقت يمشي وكنت نادم على الاستقالة؛ وقدمت على شركات المراجعة الBig4 واتصل عليهم وللاسف يرفضون بحكم اني غير مؤهل !! بسبب اللغة رغم انه كان يعج ىالباكستانيين.

عملي عام 2008

في فترة 2008 ماكان فيه ضغط زي اليوم بالسعودية ولذلك كان فيه رفض من الشركات وكنت مقهور ؛ ليش الباكستاني او الهندي بنفس عمري ذاك الوقت 23 سنة ؛ ولاقي وظيفته في شركات المحاسبة الBig4 وطبعا اكيد لغته بسيطة لكن يعلمونه ابناء جلدته كل المهارات ليكون مستشار علينا بعدين !!

مرة كنت خارج من البيت واتصل بي صديق نجتمع معهم وطبعا ما انسى ذاك الكبري اللي اجتمعنا تحته وكل واحد يشكي همه او يقول انجازاته ومغامراته.. قلت لهم قصتي مع القطاع الحكومي اللي اتمناه ولا قبلوني؛ جاوبني صديق لي : ترا يدورون محاسبين رح قدم عليهم ثانيه ورح لم ادارة (كذا).

بالفعل اخذت ورقة وحده الCV مطبوعة ورحت اقدم عند هذي الادارة وسالت عن المدير اللي ذكره لي صاحبي قالوا: غير موجود !! لقيت مدير اخر اسمه عبدالعزيز عطيته اوراقي ، ناظر في عيني قال وين ملفك ! قلت اي ملف طال عمرك؛ قال الاخضر!!! – قلت ما معي ملف اخضر بس اذا تبيه جبت لك واحد..

كنا على نهايات فكرة الملفات الخضر وبدايات استخدام الايميلات لارسال الCV فاستغربت من طلب المدير؛ رفضني طبعا حتى بدون ما يسال عن المعدل.. واتصلت بصاحبي قلت وين تقول يدورون محاسبين؟ قال لازم تقابل مسؤول التوظيف في الادارة وليس المدير ؛ سالت عن موعد تواجد مسؤل التوظيف.

اليوم التالي حضرت ولقيت مسؤول التوظيف في رحب بي وطلب الCV وكنت اطلب ربي مايشوف المعدل الجميل (مقبول)! وللاسف شافه ؛ قال قطاعنا ما يقبل اقل من جيدجداً ؛ قلت: ممكن تختبرني وتشوف قد اكون افضل منهم؛ راقت له الفكرة ؛وبدا يسال عن المحاسبة وكنت اجيبه كان يسال عن معالجة المدينين.

ربما يهمك  تجربتي في اختبار التحصيلي و التجميعات

علمته التفاصيل قيود التخصيص والاعدام وكيف نعكس الاعدام في حال استلام المبلغ فصلت له بطرق التخصيص نسبة من المبيعات او المدينين.. انبهر وقال شوف ما اضمن لك قبولك بس شخصياً بعرض موضوعك على معالية ليقبلك معنا بشكل استثنائي.

ما هي نتيجة المقابلة

بالفعل جاني اتصال بعد اسبوع وطلبوا مني مقابله اخرى.. مع مدير عام ؛ وطبعا حصل موقف مهم؛ بعدما جيت لحضور المقابله الثاني جلسوني بالانتظار قرابة ال3 ساعات لدرجة قررت امشي، وقبل امشي وافاني احد زملاي بالدراسة بالصدفة وسالني هل توظفت معنا قلت لسا مقابله ولي 3 ساعات وشكلي بامشي!..

قال صديقي: “خل صدرك شمالي” يعني لا تعصب واجلس واصبر لانهم يختبرون صبرك واصرارك، رجعت مباشرة الى الانتظار وانتظرت، طبعاً لو مشيت كان ما وصلت اللي اليوم وصلته؛ فاعتبر صدفة لقائي به رزق ونعمه.. نادوني للمقابلة.

سالني المدير العام في المقابله اسئلة الكن اسهل من المقابله الاولى كان مركز على الشخصية ( attitude ) وهو جانب ادركت بعدين انه مهم بدرجة مثل المعدل او اكثر ؛ ماحد يبي يوظف واحد نفسيه صراحة ؛ حتى لو كان معدله زين وشغله زين؛ انتهت المقابله وكانه يلمح انه يبيني معهم ..

بعد اسبوع جاني اتصال بقبول اوراقي وتم توظيفي في هذا القطاع المميز واللي كان احد اسباب نجاحي الحمدلله، رغم ان معدلي مقبول .. كان هذا اكبر عامل للنجاح وباشرحه بعدين .. راتبي كان 7500 ريال قطاع شبه حكومي والمهم عندهم ابتعاث ولغة ..

محطتي الاخيرة في العمل

وظيفتي في هذه الجهة اللي كنت احلم بها كانت بالنسبة لي اخر الاحلام؛ شرحو لي نظامهم يعلموني لغة ويبتعثوني وكنت في قمة فرحتي وشعور بالنصر في داخلي وراتبي كنت اعتبره حلو 7500 وبيزيد خلاص وش باقي!؟ تعب السنوات في الدراسة كلها تحقق والان جا وقت الراحة، حتى التطوير باخذه بالراحة.

بس يوم باشرت ما كتملت سعادتي صار شي؛ جلست انتظر يجي شغل زي ما تعودت يوم كنت محاسب بالشركة؛ ولا جاني شي!! ورحت المدير طلبت شغل قال: خلك الان بنفكر كيف ندخلك بالشغل!!! حتى الموظفين في قسمي او صفة مكاتبنا شلة وحده وشكلهم مايبون احد دخيل عليهم؛ اجلس 8 ساعات لا شغل ولا حتى احد يسولف.

وحتى اقتل هذا الطفش بالعمل شريت كتاب؛ كان في بالي اي كتاب؛ لكن هذا الكتاب هو التغيير الكبير اللي احدثه بحياتي ؛ غير نظرتي حتى في مفاهيم المحاسبة علمني امور ماليه وحسابات وقياسات محاسبيه لا تدرس بالجامعات اسم الكتاب ( الاب الغني والاب الفقير) مؤلف الكتاب تاجر ويشرح نظرياته المحاسبيه.