بتكلم في هذا المقال عن اهمية كتاب الصندوق الاسود للقدرات كمي و لفظي والشغلات اللي اذا اتبعتوها في اختبار القدرات سواء قدرات كمي او ورقي بتمكنكم بعد مشيئة الله تلتحقوا بأقوى الجامعات و أفضل التخصصات.

بالبداية قبل لا تكملوا قراءة عندي عدة نصائح لصالحكم:

  1. يفضل تقرأوه و انتم مصحصحين و ياحبذا يصاحبه كوب مشروبكم المفضل.
  2. اذا عندكم دفتر ملاحظات صغير سجلوا فيه اهم المراجع اللي بحكيكم عنها.
  3. حسابي بيكون مختص بما هو مقارب لهذا المحتوى و بأشارككم بأهم تجاربي الدراسية و غيرها اللي اغلبنا نواجهها.
  • بالبداية خلونا نبدأ بالقسم الكمي:

طبعاً هذا القسم انا في بداية حرفياً ما عندي خلفية فيه و خصوصاً بإن اغلبه يعتمد على تأسيس المتوسط و بما اني كنت بخلص كنت بالغالب اعتمد على تحديد كم سؤال و اوقات احفظ و نادر افهم و كانت ماشية أموري.

المهم بعد كذا بدأت ابحث مثلكم عن تجارب الطلاب اللي قبلنا و اقرأ تجاربهم، بعد العديد و المديد من آراء الطلاب المختلفة بدأت بتشكيل خطتي الخاصة و تحديد مصادري بناءً على إجماع الأغلب من اللي معدلاتهم مرتفعة جداً و الأكثر مناسبة لي و لطبيعة مذاكرتي، لقيت تقريباً ان الكل اتفق على قوة كتاب المعاصر اعتقد (4 و 5 )في إيصال الأفكار و كثرة ترددها في الإختبار و بالفعل توكلت على رب العالمين و رحت جرير و جبت كتاب المعاصر 5 بلس على هذاك الوقت.

حطيت لي خطة و بدأت فيها خلال الصيفية عشان اكون مرتاحة و بنفس الوقت استغل الفراغ و ما اخلي مجال لي اني اجلس فاضية او اطفش و كانت الخطة متوسطة نوعاً ما و كنت احاول استغل الوقت قد ما اقدر و أنجزت الحمدلله بفترة شهر و شوية، ترى كان يمدي ب 3 اسابيع تقريباً.

و في يوماً بينما كنت اتجول بإحدى قروبات التليجرام شفت خبر بإنه بينزل المعاصر 6 و ما أخفيكم حرفياً ما قدني انتظرت شي بحماس على كثر ما تحمست له.

والله وبعد خمسين جولة على جرير و كل يومين و انا مقلقة الموظفين رايحين جايين نسألهم اذا نزل و لا باقي، جبته الحمدلله و كان يحمس وتنسيقه يفتح النفس و طبعاً لا يقارن بالمعاصر 5.

و من هنا بدأت و حطيت خطة و قسمتها على الفترة اللي بحاول إني أنجز فيها + جبت اشياء احبها و حطيتها عندي بالمكتب على سبيل المثال سويت لي درج صرت احط فيه المفرحات و الشيبسات و كذا.

طبعاً الميزة الذهبية بالكتاب يوجد فيه عدة خصائص تفاعلية ما يضاهيها اي دورة او كتاب لأن وقتها حطيت الخيارات المتداولة اللي تعرفوها و قارنت بينهم من كل الأوجه.

طيب دقيقة خلونا نتكلم عن ميزات الكتاب اللي فادتني شخصياً بشكل ما تتصوره و هي كما يلي:

  1. كل درس بالكتاب مزود بالباركود و شرح مفصل لكل سؤال من التجميعات و أسرع و أسهل طريقة بالحل.
  2. في بداية الكتاب موجود بطاقة اسمها البطاقة الذهبية تدخلوا منها على المنصة و تختبروا بظروف و توقيت محاكيين لظروف الاختبار.
  3. و النقطة الأشد أهمية بأن الأستاذ عماد الجزيري يحدد فترة معينة من العام في حال كان عندك الكتاب ترسل الفاتورة للآدمن و تدخلوا بقروب الدورة اللي تجي مع الكتاب و تكون بث مباشر مع الأستاذ و تجاوبوا و تتفاعلوا فيها.
    و هذي النقطة بالذات بسهب لكم فيها لإن كان التركيز فيها مو على تجميع معين أو آسئلة بقدر ما انه منصب على الأساسيات و حرفياً من قوة ما أساسي كان قوي بفضل الله ثم هذه الدورة صرت لما اذاكر الآسئلة اجيبها بعدة اشكال اخرى و احاول أوجد حلولها عشان أوسع مداركي مع الأسئلة.
    كل هذا و أنا كنت احضر بشكل شبه يومي و جت فترة سافرت برا المملكة و سحبت على كذا محاضرة + ما فتحت و لا تجميع بس كنت اتدرب بأوقات و حصص الفراغ على بعض الأسئلة بكتاب المعاصر.
  4. جميع ما تتصوروه من اسئلة موجودة بالكتاب، و الشي الخرافي بعد ان الأستاذ مااكتفى لهذا الحد و قرر أيضاً يشرح تجميع ال85 الكمي كامل و هذا الشي خلاني استغني تماماً عن النموذج و صرت افتح المقطع اتدرب،
    و قبل لا يشرح السؤال احاول مرة و مرتين *يعتمد عالتأسيس* و الحمدلله كنت ماشية مررة معاه و اذا علقت بشغلة اشوف الشرح اذا تمام اسوي سكيب للسؤال و انتقل للي بعده.

متخيلين كل هذا الجهد المخيف من طاقم العمل و الأستاذ بمجرد ما انك تشتري كتاب سعره ما يتجاوز ال100 ريال!!

و طبعاً مع الوضع الحالي الأغلب صار معتمد على الأونلاين لذلك تقدروا تطلبوه من متجر جرير.

و طبعاً لازم احكيكم عن البورد المثالي اللي هو مركز قياس معتمدته عندها + بيساعدكم بتوفير الورق سواء بالقدرات أو التحصيلي… هذا هو و تقدروا تطلبوه من نون اذا حابين أو تلاقوه بلولو هايبر.

و هنا بووه داهمني الوقت و رحت اختبر و صار ما بقى شي على وقت اختباري و كانت الصددمة… بإنه هذه نسبتي و الحقيقة ما كنت اتصورها بتوصل لهذا الحد.

طبعاً لحظتها تلاشت كل الأيام اللي استغنيت فيها عن الطلعات العائلية و افلام السهرة و مسلسلاتي المفضلة و افتكرت جملة “سيكون العوض من الله معجزة، فتعجز عن شكره”

  • تمام الحين بتكلم لكم عن القسم اللفظي

و اللي للآسف من سهولته أغلبنا أو أكثرنا نستخف فيه لدرجة نذاكره *بريال* على ما نقولها، المهم طبعاً اذا كنتوا داخلين ورقي لازم تكونوا على علم بأن اللفظي غالبيته ما بيكون صعب لكن بالغالب أكثره جديد او من التجميعات الورقي للأعوام الماضية و بتكون كثيرة نوعاً ما ابغى اخوفكم لكن ببين لكم الموضوع من كل الجهات.

عشان كذا انصحكم بشدة زي ما انصح اخوية اللي معاكم بأنه اذا كنتم مهتمين بكتاب الأستاذ عماد الجزيري و دوراته و شرح ال85 كمي عن فهم و باقي لكم اللفظي سجلوا محوسب او عالأقل حطوا ببالكم انه اختباري الجاي محوسب.

بعد كذا امسكوا نموذج ال85 شوفوا بالنسبة للنموذج في كثير معلمين يعطوا فيه دورات و من ضمنهم أ/إيهاب عبدالعظيم شفت عليه مدح كثير لكن!
إذا مو حابين تشتتوا نفسكم بكثرة الدورات و الشروحات شوفوا كتاب (الرابح) لإنه موجود في النموذج كامل و قسم للمحوسب و قسم لتجميعات الورقي.

طبعاً لما بدأت باللفظي ركزت على حفظ القطع بما أنها الجزء الأضخم و تحتاج لتركيز و الصدق بكتاب الرابح منسقها بقسم لوحدها و منقحة بشكل مريح للنظر و للمذاكرة و المعلومات تتسلسل معاكم لإنه مقسم القطع الكبيرة و الصغيرة على حدة.

فحفظتها زي اسميي تقريباً ، و بعد كذا مسكت نموذج الصندوق الأسود و بدأت اراجع القطع و احفظ باقي الشغلات زي التناظر كان يحتاج فهم و إكمال الجمل و الخطأ السياقي و برضوا هذا الشي سلسلة المعاصر في حال اشريت كتاب اللفظي أو الكمي تحصل على دورة متكاملة للقسمين و هذا الشي ساعدني.

طبعاً معلومة عشان تطمنوا النموذج صفحاته حول ال600 صفحة لكن من بعد أول 100 صفحة تقريباً حتلاقوا نسبة تكرار كبيرة جداً و افتكروا دائماً بإنه اللحظة هذه تستحق الكثير لأجلها و مو صعب لإنه غيرك مو أحسن منك و جابها.

اهمية كتاب الصندوق الاسود للقدرات كمي و لفظي

مصادر.