الإعلانات

فقدان الوزن ليس دوما بالامر السهل نقدم لكم هنا طريقة فقدان الوزن تصل الى 22 كيلو خلال الحجر بدون أي رجيم وعمليات أو حرمان وترهلات.

طريقة فقدان الوزن الزائد

طريقة فقدان الوزن

 

أنا منيب أخصائي تغذية ولا دكتور أو مدرب رياضي أنا فقط استفدت من محتواهم في شبكات التواصل ومن مواقع رسمية ومن قوقل وأكتب لكم بناء على تجربة شخصية.

  • أي شخص عنده معاناة صحية أو حساسة من أكل معين لازم يستشير الطبيب.
  •  خلونا نتفق أن أي إشارة لأشخاص أو علامات تجارية في هذي التغريدات هو من باب نقل التجربة فقط.
    ولا يعني أنها ممتازة أو سيئة وفيه بدائل كثيرة لكل شي ولا يعني أنه إعلان مدفوع.
    الهدف من ذكرها هو التوضيح أو التسهيل أو التقريب.
  •  ما حرمت نفسي من أي نوع من أنواع الأكل آكل خضروات وفواكه وبرضه آكل شاورما وجريش وشوكولاته وكل شي وباكل في مطاعم لو خلص الحجر لكن عرفت سر وليتني عرفته من زمان وبقوله تحت.
  • هذا نموذج من أكلي الفترة الماضية وبستمر عليها ان شاء الله

  •  اقتنعت قناعة تامة أن كل شي يجي بالتدريج عشان كذا أول ما بديت غيرت أهم 3 عادات يومية:
  1. ضبطت نومي ( 7-8 ساعات في اليوم)
  2. ثم ضبطت أكلي
  3. وفي الأخير سويت رياضات خفيفة

وبين كل عادة وعادة تقريباً اسبوعين عشان ما أمل.

  •  قررت أن اللي أسويه بيصير نمط حياة يعني ما فيه رجيم معين والا وقت محدد وبوقف قررت أنه يصير جزء من يومي ومن عاداتي وبيستمر هذي النتيجة اخذت مني تقريبا 3 شهور ويمكن تاخذ منك أقل أو أكثر أنت وجهدك
  •  كمية السعادة اللي وصلت لها بعد ما نزل وزني مو طبيعية نفسية زينه جسم خفيف أي لبس يزبط عليك وأشغلت العالم أني نحفت

صدق شعور جميل ما يوصف وعقبالكم كلكم تحسون فيه.

  •  اقتنعت قناعة تامة أن ما فيه شي أسمه “أكل غير صحي” لكن فيه “عادات غير صحية”

حتى التفاح  لو بتاكل أكثر من حاجتك بتسمن لأنه في النهاية طاقة تدخل جسمك  لو زادت عن حاجتك بتتخزن على شكل شحوم مكعب الشوكولاته الصغير ما يضرك يضرك أنك تدغّ فيه لين تقول بس

  •  عشان تاكل أكل نظيف، موب لازم يصير ماصخ بدون ملح وش حادك تاكل رز ناشف تغصغص فيه والا قطعة دجاجة مشوية تعلك فيها ساعة استمتع بأكلك حط ملح بهارات وحتى صوصات لا تحرم نفسك  لكن بعد ما تطبق السر اللي تحت
  • هذي صور البهارات والصوصات اللي أستخدمها في الأكل

  • حطيت لي هدف واضح عشان أوصله وزني كان 92 كيلو الهدف 70 كيلو طبعاً الهدف موب من راسي الهدف كان من موقع وزارة الصحة صفحة تحط فيها عمرك وطولك ووزنك ويعلمك كم الوزن المثالي لك.
  • شيك على وزنك من خلال الضغط هنا

  • نجي للسر

السر أني تعرّفت على “السُعرات الحرارية” وأسمها بالانجليزي calories أو “كالوري” وعرف كيف أتعامل معها كنت أشوفها معقدة وكنت أشوف اللي يهتمون فيها موسوسين لكن بعد ما عرفتها طلعت سهلة جداً وطريقة التعامل معها سلسة وهي أهم سبب في نزول وزني
 وشي السعرات الحرارية

مثال:

طاقة السيارة هي البنزين ويقيسونه باللتر وتختلف كمية البنزين من سيارة لسيارة.

وطاقة الإنسان هي الأكل  ويقيسونه بالسعرات الحرارية ويختلف احتياج الجسم للسعرات من شخص لشخص.

إذاً ، السعرات الحرارية هي وحدة قياس الطاقة الموجودة في الأكل.

  • الحين يبي لك تركز أكثر في اللي تحت لأن فيها أرقام وفيزياء وهي الزبدة

بس صدقني سهلة ولو استوعبتها بتبدأ تنصدم من كمية السعرات اللي تدمرنا كل يوم.

كل وجبة أو أكلة لها سعرات حرارية تختلف عن الثانية وكل جسم له كمية محددة من السعرات الحرارية اللي ياكلها كل يوم.

ببساطة:
إذا زادت السعرات اللي تاكلها عن احتياجك اليومي يزيد وزنك
وإذا قلت السعرات عن الإحتياج اليومي ينقص الوزن

  • كيف أعرف احتياجي من السعرات الحرارية؟!

هنا تعبي بياناتك ويعلمك كم احتياجك من السعرات من خلال الضغط هنا

مثال لسعراتي:
2250 سعرة هي الكمية اللي كنت آكلها باليوم
1900 سعرة هي الكمية اللي لازم آكلها عشان أنحف (ببطء) وأوصل للوزن المثالي اللي هو 70 كيلو.

 

  •  شفت احتياجك من السعرات؟
    طيب أي كمية سعرات تاكلها أكثر من اللي طلع لك ترى بيزيد وزنك.

خلني أصدمك شوي ببعض السعرات الموجودة في الاكل وقارنها بالاحتياج اليومي حقك

تدري وجبة بيق تايستي =2080 سعرة
وحبة البيتزا = 2000 سعرة

يعني سعراتها أكثر من احتياج يوم كامل

  • الوجبة السريعة الوحدة لو أكلتها ما تسمّن اللي يسمن أنك تاكلها كل يوم إذا بتاكل وجبة كلها بذكاء وهندس فيها

مثال:
خل الببسي دايت = يطيح 140 سعرة
البطاطس خذ صغير يطيح 400 سعرة
وجبة صغيرة تطيّح نص السعرات وهكذا

  • أهم شي اعرف سعراتك اليومية واعرف متى تاكل ومتى ما تاكل.

  • قاعدة أساسية

عشان تنزل 1 كيلو في الأسبوع لازم تنقّص 7000 سعرة من احتياجك الأسبوعي يعني تقلل 1000 سعرة في اليوم والعكس لو تبي تزيد الوزن.

يعني 3 وجبات بيج تايستي هذه تقريبا 1كيلو زيادة

  • فيه طريقة تنزّل من السعرات اليومية غير تخفيف الأكل تحرقها بالرياضة  هذي الصورة التقريبة مثلاً فيها وجبات وفيها حجم التمارين اللي تسويها عشان تحرق هذي الوجبات مثل هذه الصور تخليك تفكر ألف مره قبل تاكل أو تصير عارف وش بتسوي قبل ما تاكل هذي الأكلة أو بعد ما تاكلها هل تخفف في الوجبات اللي بعدها أو تسوي رياضة عشان تحرقها وهكذا.

  • السؤال الأهم

كيف أحسب السعرات الحرارية في الأكل؟

ببساطة من قوقل اكتب مثلاً:
رز سعرات
أو دجاج سعرات
تفاحة سعرات
وتطلع لك النتيجة

طبعا السعرات الحرارية بالانجليزي (كالوري – Calories )
وأحياناً يسمونها (طاقة – Energy )
واختصارها = Kcal أو Cal

  •  طيب هل لازم ميزان ؟ لا طبعا تقدر تحسب بالكوب والكاس وبالملعقة ومو شرط نفس أكوابهم بالضبط الفروقات البسيطة ما تضر ولا تصير دقيق مرة عشان ما تطفش.

الحسبة سهلة:
السوائل باللتر والمواد بالجرام أو الكيلو.
كل كيلو فيه 1000 جرام
وكل لتر فيه 1000 ملي لتر

*أبحث في قوقل

  • انتهت المرحلة الصعبة
  •  ترى موب مطلوب منك تحفظ السعرات الحرارية في كل منتج في البداية خل قوقل جنبك، ومع الوقت بتكتشف أنك حفظتها وبرضه معد تحتاج ميزان ولا كوب وملعقة  بتصير تقيس بالنظر

  •  مهم تعرف كيف تقرأ جدول الحقائق الغذائية اللي كلن ساحب عليها للأسف (ابحث عنها أكثر في قوقل تراها مهمة جداً) اللي يهمك أول قسمين فوق حجم الحصة وكمية السعرات اللي في الحصة والباقي تتعرف عليه بعدين.

  •  تلخيص سريع 
    معرفة السعرات الحرارية وترتيب أكلي ورياضتي بناء عليها هو السر الوحيد اللي خلاني أنحف  لا رجيم ولا حبوب ولاخرابيط.
  • نوعت في أكلي اليومي كل وجبة حاول تحتوي على ٥ عناصر قد ما تقدر
  1. بروتين
  2. نشويات
  3. مشتقات الحليب
  4. فواكه
  5. خضروات

واذا ما تقدر تجمعها في وجبة وحدة عادي اللي ما تاكله في الفطور كله في الغداء والا عوضه في العشاءلا تشدد على نفسك وتمل التوازن زين

طريقة فقدان الوزن

  •  ما عندي يوم مفتوح لأن أكلي كله مفتوح أساساً بس مضبط وزنيتي في السعرات

اليوم اللي بتغدا فيه من مطعم مثلا أصير مخفف فطور ومخفف عشاء أو زايد في التمارين وهكذا

  • أهم شي في المحصلة النهائية لا تزيد سعراتك عن الحد اليومي
  •  طيب وش التمارين اللي كنت تسويها أي نوع من أنواع الرياضة يفيدك طبعاً الرياضة مهمة عشان ما يجيك ترهلات لو 20 دقيقة في اليوم وكل فترة تزيد في الوقت وتزيد في العدّات لاتشد على عمرك وابحث في قوقل ويوتيوب عن رياضات 20 دقيقة وشف اللي يناسبك
  • رياضتي باختصار:
  1. يوم تمارين بوزن الجسم
  2. يوم تمارين قلبية
  3. يوم راحة

التمارين 20 دقيقة ( 20 نط الحبل -10 ضغط صدر – 10 سكوات – 10 بيربي – 20بلانك ) 5 جولات

والقلبية – ساعة ( مشي – سيكل – هرولة.. إلخ)

وتقدر يوم تمرين ويوم راحة لا تضغط على عمرك ومع الوقت بديت أزيد

  •  فيه شي بيساعدك على الرياضة بشكل ما تتصور ” سماعة ” تنسيك تعب التمرين والمشي الطويل حط لك بودكاست والا موسيقى تنقزك وأنت تتمرن وأحرص أنها تصير من السماعات الكبار وقطنتها مريحة للأذن

  •  تابعت حسابات محفزة في انستقرام  اللي فيها صور قبل وبعد وصرت أشوفها يوميا واتشجع وكل يوم أدخل على صفحات فيها وجبات حلوة أدخل على حسابات أشخاص أجسامهم صحية أو مدربين وبرضه أبحث في يوتيوب عن تمارين من البيت وهكذا هذه الحسابات تخليك تمسك كرشتك وتقوم غصب
  •  حرصت على البدائل اللي أخف طاقة في كل شي الألبان آخذ منزوع الدسم وكلها نفس الطعم تقريبا المشروبات الغازية آخذ دايت أركز على المسلوق والمشوي أكثر من المقلي في كل شي أشرب موية غاز تغنيني عن الببسي والسفن وانت ماشي.

  •  بديت أستخدم أدوات الأدوات البديلة في الطبخ شريت جهاز طبخ بالبخار أخذت لي جهاز القلي بدون زيت أو بالهواء بديت أستخدم بخاخات الزيت بدال الزيت صرت استخدم المايكرويف لتحضر الوجبات الخفيفة مثل الشوفان وغيرها.

  •  لاتوزن جسمك كل يوم خل الميزان مرة وحدة في الأسبوع وكان ودك تستخدم التقنية برضه زين يا ساعة أبل تعلمك كم حرقت سعرات وكم خطوة مشيت وكذا أو ساعت فت بت وميزانهم  وهي اللي أستخدمتها وتعلمك كم نسبة الدهون وترى عادي تستخدم ميزان أبو عقارب لا تدور عذر

 

  • خطط للقرار الجديد وشد حيلك وابدأ في أسرع وقت وترى أول الغي طرة واستغل فترة الحجر
  1. نوم
  2. سعرات حرارية وأكل متوزان
  3. رياضة

إذا عرفت تتعامل معها بتكتشف أنك ما تحتاج تسوي رجيم ولا أنت مضطر تحرم نفسك من أي وجبة تحبها

  • إذا قررت تبدأ لا تصير وحيد ولحالك شف لك مجموعة أوناس مثلك وحولك يشجعونك وتشجعهم أنا عن نفسي قررت أخلي جزء من يومياتي في سناب عن هذا النمط الجديد اشوف كلامكم اللي يشجع وأنقل لكم التجارب اليومية
  • ما أنتهت رحلتي هنا بعد ما حققت الهدف قررت أمارس رياضة جديدة عندنا في السعودية وتعتمد على وزن الجسم أسمها: الكاليسثنيكس أو Calisthenics وبعد ما أحقق فيها نتائج بنزل لكم تجربتي فيها

والوعد بعد 6 شهور ان شاء الله

مصادر