تنظيم الوقت أسراري البسيطة

khaled 24 ديسمبر، 2022

بتكلم لكم عن تجربتي “الشخصية” في تنظيم الوقت ! معاكم روضه! أكثر شخص منظم ودقيق عرفته في حياتي .. ورغم اني شخص مزاجي إلا إن مزاجي دائما عامل مساعد على التنظيم والانجاز والالتزام بالوقت! سألتوا شلون .. 🧐؟ بسيط أنا بقولكم أسراري البسيطة جدا خذوا ما يناسبكم منها واتركوا الباقي ..

أول سؤال تسأله نفسك :
ليش أبي أنظّم وقتي؟
– أبي انجز دراسيا أو مهنيا .
– أبي اسوي أشياء اضافيه
– أبيه لأنه عندي مسؤوليات كثير
– أبيه لأنه عادة جيدة
– أبيه لأنه يحسسني بالأمان.. عندي وقت
خلونا نتفق كل سبب له تأثيره ! وكل ما تكون واضح في أسبابك ورغبتك في تنظيم وقتك كثر ما تنجح

وضحت أسبابك ! حلو .. ممتاز .. ننتقل للي بعده .. مهارة تقييم الوقت وتقييم سرعتك في أداء المهم !

كم الوقت اللي بيدي؟ .. انت تداوم ٧ ساعات هذه شيلها من الحسبة ! عندك وقت قبل الدوام وعندك وقت بعد الدوام ! محد يتوقع منك تستغل كل ساعه باليوم (هذه مثالية ومبالغه) ..

لنفترض هذا السيناريو .. (دوام سبع ساعات) قبلها عندي ساعه بس اجهز فيها حلو هذه برضو ممكن نخليها ساعة رواق واستعداد نفسي (صحة نفسيه) .. بعد الدوام ! فيه قيلولة ! حلو .. استثمار في الصحة الجسدية (عقلك يحتاجها) بعد القيلولة .. الى وقت النوم.. هذا وقتك المنشود (نتذكر بس انه سيناريو)

حط السيناريو الفعلي ليومك ! ولعاداتك واحسب الوقت اللي عندك .. هذا الوقت هو اللي نستهدفه .. ونستهدف تنظيمه عشان انا ما احب التنظير .. انا احب الواقع الفعلي .. حلو .. الوقت خلصنا منه .. نجي للمهام ؟ ايش المهام اللي عند .. ١،٢،٣ .. احط المهام .. وتتقسم .. أسبوعية، يوميه..

واحط في بالي تصور .. هذا الشهر بالضبط ايش مطلوب مني؟ او ايش متوقع مني انجزه .. وابدا اقسم المهام على الاسابيع ومهام الاسبوع على الايام .. مثلا ! فيه اسايمنت (واجب) آخر الشهر .. احطه بالجدول بالاسبوع المناسب لأهميته ! عندي غسيل ملابسي ! هذه جدولته اسبوعيه (ثابته ومستمره ماتتغير)

وقيس عليه جميع مهامك من اصعبها لين ابسطها .. وحط في بالك في مهام ثابته ! لا تغير موعدها الا للضرورة القصوى ! ليش ؟ لأنها تصير عندك عادة وعادة ماتاخذ وقت ! زي بروح الجيم ! ممتاز .. احنا استغلينا الوقت واستثمرت في صحتك النفسية والجسدية .. نجي للمعضلة الدراسية ! السرعة في الاداء

قيّم سرعتك ! أنا سريعة بالكتابة ! ممتاز هذه اخليها للوقت الضيق ! واخصص وقت اطول مثلا للقراءة! ابدأ اشوف مزاجي واقيمه ! انا مزاجي اليوم سيء جدا ! اذا نستبعد المهام الثقيلة واركز على المهام اللي ما تتطلب مزاج وتركيز! مثلا اليوم برتب الغرفة ! اليوم والله بقرأ المحاضرات بشكل سريع

اليوم والله مزاجي ممتاز .. حلو اخصصه للمهام الثقيلة واللي تاخذ وقت ! استغل طاقتي وانجز بشكل اكبر واعلى .. اغتنم الفرصة ! وعيني على الجدول اليومي والاسبوعي على طول .. وافضل حل البورد (سبورة صغيرة)! الخرائط.. او تطبيقات الوقت .. اختار وسيلة تناسبك وتحفزك على التركيز

يوميا حط مهام واقعية ومنطقية! لا تحط مهام خيالية وبعدين لما ماتنجزها تزعل ويصيبك احباط وتقول تنظيم الوقت مش لعبتي ! يمكن طيب انت مش عارف تلعب بس ومحتاج تغير تكنيك او اثنين ! المهام الواقعية مهمة جدا لسلامة الالتزام بالتنفيذ.. ولا تسمح لمزاجك يحبطك ! المزاج مرات يحتاج تخدعه بمعنى:

لما تشوف مزاجك بدا يتلكع (وتحصل كثير) ركز على مهام خفيفه وابدأ فيها لا تفكر على طول ابدأ .. وشوي شوي بتشوف نفسك مكمل شغل ! بتشوف نفسك جالس تنجز .. نفسيا بتحس ان مزاجك تغير لأنك تحس انك جالس تستفيد من وقتك وانك رغم مزاجك الا انك تنجز وهالشيء يصالحك على نفسك .. عشان كذا ابدأ ع طول

مش ضروري تنجز ١٠٠٪ يكفيك لو انجزت ٦٠٪ – ٧٠٪ .. يكفي او تنجز مهمه ثقيلة من اصل ثلاث! شوي شوي بيتحسن الامر ! لا تترك التنظيم فقط لانك تعتقد انك ما تفلح فيه ! .. الصبر والتعوّد الى جانب المهارات اللي ذكرتها بتساعد كثير وحاول مره ومرتين وثلاث الى ان تكتشف ادواتك الشخصية .. وتذكر :

إن تنظيم الوقت مهارة ! الوقت عند الكل ٢٤ ساعة .. والمسؤوليات بتزيد ! احرص تتعلم المهارة لأنك اليوم بلحالك ! بس بكرا بتصير مسؤول وعندك (اسرة) أو فريق عمل ! او عندك اكثر من منصب او وظيفة ! تأكد انك تبني مهارتك وتشكل أدواتك قبل تدخل دوامة جديدة .. لانك وقتها بتكون مشغول بأمور اخرى

واعتبره استثمار في شخصيتك! صحتك ! وعلاقاتك مع الناس اللي بحياتك .. 🌿

كل التوفيق لكم

Originally tweeted by Rawdah | روضه (@ralfadhley) on December 19, 2022.

الوسوم